Azad Rəhimov: "Futbolda vəziyyət dəyişməlidir”

Futbol üzrə Azərbaycan milli komandasının yeni baş məşqçisinin kimliyinə dair qərar hələ qəbul olunmayıb. Lent.az-ın məlumatına görə, bu barədə jurnalistlərə gənclər və idman naziri Azad Rəhimov açıqlama verib.

 

Yığmaya hazırda “Qarabağ”ın baş məşqçi postunu tutan Qurban Qurbanovun namizədliyinə gəldikdə, Rəhimov hər bir namizədi normal hesab etdiyini bildirib. Onun fikrincə, hər bir namizəd öz proqramı ilə gəlməli, təkliflərini, ideyalarını deməlidir: “İstərdik ki, yeni baş məşqçi savadlı, təcrübəli, bu işi bilən və qurmağı bacaran baş məşqçi olsun. Düşünürəm ki, AFFA düzgün seçim edəcək”.

 

Bununla yanaşı, Rəhimov futbolumuzun hazırkı durumu ilə bağlı fikirlərini də açıqlayıb: “Ümumiyyətlə, düşünürəm ki, futbolda vəziyyət dəyişilməlidir. Yəni, klublarda inkişaf olmalı, onlar öz strategiyalarını dəyişməlidirlər. Dəfələrlə qeyd olunub ki, dünyanın 10 ən məşhur mütəxəssisi gələrək, burada məşqlərə başlasa, baza və əlində işləməyə yaxşı material olmasa, biz o nailiyyətləri qazana bilmərik. Futbol elə bir idman növüdür ki, burada milli komanda uşaqlıqdan məktəb, futbol akademiyası, klubların aşağı yaş qrupları üzrə heyətləri və gənclərdən ibarət yığmalardan formalaşdırılmalıdır. Sözsüz ki, bu addımların AFFA tərəfindən atılacağını düşünürəm”.