"İsraildə kişi kimi oynamadıq"

"Bu oyun haqda danışılası bir şey yoxdu. Biabırçılıqdı, bu cür futbol oynamaq olmaz". Futbolxeber.az saytına verdiyi açıqlamada bu sözləri 21 yaşadək futbolçulardan ibarət millimizin qapıçısı Andrey Popoviç dedi.

Seçmə mərhələnin son matçında İsrailə 2:7 hesabı ilə uduzduqları oyun barədə danışan Popoviç ağır yenilginin səbəbləri haqda bunları söylədi: "Oyuna yaxşı hazırlaşmışdıq. Lakin matçın əvvəlində qapımızda 2 qol gördük. Bundan sonra isə özümüzə gələ bilmədik. Rəqib güclüdü, amma biz də çox pis oynadıq. Təkrar edirəm, uduzmaq olar, amma belə olanda da yenə layiqli mübarizə aparmaq lazımdı".

"Oyundan sonra baş məşqçi Bernhard Lippert sizə nə dedi" sualını Popoviç belə cavablandırdı: "O heç nə demədi. Lippert özü də bizim oyunumuzdan şoka düşmüşdü. Çünki biz kişi kimi oynamadıq. Yenilgiyə görə baş məşqçi yox, biz günahkarıq".

Biabırçı yenilgidən sonra AFFA-nın baş katibi Elxan Məmmədov mətbuata verdiyi açıqlamada komanda üzvlərinin cəzalandırıldığını bildirdi. Lakin Popoviç bundan xəbərsiz olduğunu dedi: "Cəzalanmağımızdan xəbərsizəm. Çünki oyundan dərhal sonra mən Türkiyəyə gəldim. "Sutoçnu"larımız kəsiləcək? İndi bizim "sutoçnular"ımızı bank hesabımıza köçürürlər. Amma bilmirəm ki, həmin pul hesabıma köçüb, yoxsa yox. Bu mənim üçün maraqlı da deyil. Cəriməsələr də, narazı qalmaram. Biz buna layiqik".