"Qəbələ" - "Səbail": 16-cı duel

Azərbaycan Premyer Liqasında 19-cu turunda “Qəbələ” öz meydanında “Səbail”lə görüşəcək.

Futbolxeber.az-ın “qırmızı-qaralar”ın rəsmi saytına istinadən verdiyi məlumata görə, Qəbələ şəhər stadionundakı qarşılaşma iki komanda arasında 16-cı matç olacaq.

Əvvəlki 15 oyunda 8 qələbəsi olan “Qəbələ” 4 görüşdən sülhlə ayrılıb. Yalnız üç dəfə uduzan komanda top fərqində də üstündür - 28:16. “Səbail”lə matçlarda Baqali Dabo hamıdan çox - 6 qola imza atıb.

“Qəbələ” paytaxt təmsilçisi ilə 13 dəfə çempionat, 2 dəfə kubok duelinə çıxıb. Premyer Liqada 6 qələbə qazanan “qırmızı-qaralar” 4 dəfə bir xalla kifayətlənibsə, bakılılar 3 matçda qalib gəlib. 23 qol vuran “qırmızı-qaralar” 14 top buraxıb.

“Qəbələ” öz meydanındakı 7 görüşdə uduzmayıb. 5 qələbəsi olan komanda 2 dəfə heç-heçə edib. Meydan sahiblərinin 14 qol vurduğu görüşlərdə qonaqlar 4 dəfə fərqlənib. “Qırmızı-qaralar” ev oyunlarını qolsuz tərk etməyib.

Xatırladaq ki, martın 9-da Qəbələ şəhər stadionunda keçiriləcək “Qəbələ” - “Səbail” matçı saat 15:00-da başlayacaq.