"Xəzər Lənkəran" 10 ballıq şkala ilə "10"a layiqdir"

"Xəzər Lənkəran”ın futbolçusu Edu Oriol İspaniya mətbuatın müsahibə verib. 27 yaşlı hücumameylli yarımmüdafiəçi “Saraqosa”dan ayrılmasından və ölkəmizə gəlişindən danışıb.

- Bu yay “Saraqosa”nı xeyli futbolçu tərk etdi. Siz də onlardan birisiniz. Buna nə səbəb oldu?

- Ay yarımdan çoxdur oranı tərk etmişəm. Baş verənləri unutmaq istəyirəm. Sanki məndən də, digərlərindən də zəhlələri gedirdi. Kluba hər gələn öz ideyalarını sırıyırdı, biz isə bu ideyalara uyğun gəlmirdik.

- Niyə belə idi, nə baş vermişdi?

- Bilmirəm. Onu bilirəm ki, klubdan narazılıqla ayrıldım. Çünki belə münasibətə layiq deyildim. Mənə şans verməli idilər. Lakin bunu etmədilər. Baxmayaraq ki, mən faciəvi dərəcədə zəif deyildim.

- Belə münasibətdən sonra müqaviləni sülhlə pozdunuz?

- Hə. Bir-birimizin əlini sıxıb ayrıldıq. Belə addım hər iki tərəf üçün faydalı idi.

- Lakin bəzi komanda yoldaşların məhkəmələrə, federasiyaya, hətta FİFA-ya qədər gedib müqaviləsinə erkən bitməsi üçün kompensasiya tələb edir...

- Mənim işim futbol oynamaqdı. Başqa məkanlarda “döyüşməyi” xoşlamıram. Bu üzdən pula görə savaşmayacağam.

- İndi İspaniyadan uzaqdasınız. “Saraqosa” kənardan necə görünür?

- Komandanın hər matçını internetdən izləyirəm. Mən elə belə də start gözləyirdim.

- Sizcə “Saraqosa” Primeroya qayıtmağa namizəd sayılmalıdır?

- Əlbəttə ki, oyunçuların səviyyəsinə görə namizəddir. Ənənələrinə görə isə daha çox layiqdir.

- Nəticədə Azərbaycana getdiniz. Toni Doblasın ayrıldığı “Xəzər Lənkəran”a...

- Doblas komandada qalmayıb. Amma başqa ispaniyalı – Alvaro Silva var. Onun bu klubdan heç bir şikayəti yoxdur.

- Bəs uzaq ölkəyə getməyinizin səbəbi nə idi?

- Bura gəlməyə qərar verməyim maliyyə məsələsi idi. İspaniyada mənim səviyyəmdə futbolçuya istədiyim pulu verməzlər. Mən cəmi 2 illik gəlmişəm.

- Oradakı şəraitdən razısınızmı?

- Burada hələlik hər şey ən yüksək səviyyədə, 10 ballıq şkala ilə “10”a layiqdir. Klub rəhbərliyindən çox razıyam. Söz verdikləri bütün şərtlərə əməl edirlər.