“Qəbələ” - “Sumqayıt”: 34-cü duel

Azərbaycan Premyer Liqasında XI turun son görüşündə “Qəbələ” “Sumqayıt”la üz-üzə gələcək.

Futbolxeber.az saytının məlumatına görə, Sumqayıtdakı “Kapital Bank Arena”da təşkil olunacaq qarşılaşma iki komanda arasında 34-cü matç kimi tarixə düşəcək.

İndiyədək rəqiblər 33 dəfə üz-üzə gəlib. 19 dəfə qələbə qazanan “Qəbələ” böyük üstünlüyə malikdir. “Qırmızı-qaralar” 10 heç-heçə edib və yalnız 4 dəfə məğlub olub.

80 qolun vurulduğu duellərdə top fərqi də “Qəbələ”nin xeyrinədir - 55:25. “Sumqayıt”la görüşlərdə “Qəbələ”nin ən yaxşı bombardiri Viktor Mendi 7 dəfə fərqlənib.

“Qırmızı-qaralar” Sumqayıtın eyniadlı təmsilçisi ilə 32 çempionat və 1 kubok matçında görüşüb. Premyer Liqada 18 qələbəsi olan komanda 10 heç-heçə edib və 4 dəfə uduzub. Bu matçlarda “Qəbələ” 54, rəqib 25 qola imza atıb.

16-cı dəfə rəqib meydanına çıxacaq “qırmızı-qaralar” səfərdə 6 qələbə qazanıb, 6 heç-heçə edib və 3 dəfə məğlub olub. “Qəbələ” səfərdə 22 top vurub, 15-ni buraxıb.

Xatırladaq ki, noyabrın 30-da “Kapital Bank Arena”da keçiriləcək “Sumqayıt” - “Qəbələ”  matçı saat 16:00-da başlayacaq (gabalafc.az).