"Xəzər Lənkəran"dan rəsmi açıqlama: "3 gün ardıcıl belə yağış yağsa, oyun təxirə salınacaq"

"Meydançanın vəziyyəti elə də pis deyil. Düzdür, dünəndən etibarən yağışlar yağır. Bu gün isə yağış daha da intensivləşib. Amma komandamızın məşqinin təxirə salınması düzgün məlumat deyil. Elə bu dəqiqə komanda yardımçı meydançada məşq edir". Futbolxeber.az saytına verdiyi açıqlamada bu sözləri "Xəzər Lənkəran"ın mətbuat xidmətinin rəhbəri Hüseyn Cəbrayıloğlu deyib.

Klub rəsmisi "Bakı" ilə oyunun təxirə salınması barədə sualı isə belə cavablandırıb: "İndidən bu haqda bir söz demək çətindir. Əlbəttə, 3 gün ardıcıl belə yağış yağsa, oyun təxirə salınacaq. Amma buna inanmıram. Oyuna hələ 3 gün var. İnanırıq ki, hər şey qaydasında olacaq".