Quizlərə düşəcək sual...

Ötən həftə “Qarabağ” üçün uğursuz alındı. Ağdam klubu əvvəlcə Çempionlar Liqasında mübarizəni dayandırdı. Elə də güclü olmayan “Molde”nin müqavimətini qıra bilməyən “Qarabağ” penaltilər seriyasında Norveç çempionuna uduzdu. Oyundan bir gün öncə “biz heç vaxt penaltilərə hazırlaşmırıq” deyən Qurban Qurbanovun komandası məhz 11 metrlik zərbələrin sonunda rəqibi qarşısında aciz qaldı. Əslində, elə penaltilərə hazırlaşmamağın nəticəsi idi ki, zərbəni yerinə yetirməyə oyunçu tapmayan Qurbanov yekunda məcbur qalıb Bədavi Hüseynovun lehinə seçim etməli oldu. O Bədavi ki qaçırdığı zərbə ilə komandasının qitənin 1 nömrəli klub turniri ilə vidalaşmasına səbəb oldu. Oyundan sonra verdiyi açıqlamadan məlum oldu ki, Hüseynov karyerası ərzində heç vaxt penalti yerinə yetirməyib. Kim bilir, bəlkə də bir çox məşqçilər kimi Qurban Qurbanov da futbolçularını penaltilərə məşq etdirsəydi, görərdə ki, sərəncamında penaltini Bədavidən daha yaxşı yerinə yetirənlər də var...

“Molde” məğlubiyyəti, Çempionlar Liqası ilə erkən vida, itirilən milyonlar - bütün bunları qismən də olsa unutdurmaq üçün “Qarabağ”ın yaxşı şansı var idi. Belə ki, bazar günü Ağdam klubu ölkə çempionatında prinsipial oyuna çıxdı. “Neftçi” üzərində qələbə “Molde” ilə görüşdəki yenilgini qismən də olsa unutdura bilərdi. Gəl ki, “Qarabağ” yenə də azarkeşlərini məyus etdi. Baxmayaraq ki, erkən qolla komanda önə keçmişdi. Lakin “Qarabağ” bu üstünlüyü artırmaq əvəzinə, qapısında 2 qol görməklə “Molde”dən sonra “Neftçi” qarşısında da aciz qaldı. Oyundan öncə çoxlarının şans tanımadığı “Neftçi” rəqiblə müqayisədə daha istəkli görünürdü. Füzuli Məmmədovun düzgün taktikası qarşısında Qurban Qurbanov və komandası əlac tapa bilmədi. Yekunda “Qarabağ” 1 həftədə ikinci zərbəni aldı. Ötən məğlubiyyət Bədavi Hüseynovun ayağına yazılmışdısa, “Neftçi”dən alınan yenilginin günahkarı kimi Emil Balayev göstərildi. Reallıqda isə hər iki məğlubiyyət birbaşa Qurban Qurbanovun günahıdır. Penalti məsələsinə yuxarıda toxunduq. Hər halda oyundan öncə “biz penaltilərə hazırlaşmırıq” demək yox, penaltilərə hazırlaşmaq lazım idi. O ki qaldı Emil Balayevə, millinin qapıçısının “Neftçi”nin vurduğu qollarda günahının olub-olmamasını bir kənara qoyaq. Əsas sual odur ki, nəyə görə “Molde” ilə görüşün qəhrəmanlarından olan Şahruddin Məhəmmədliyev “Neftçi” ilə matçda ehtiyatda qalmışdı? Yorğunluq? Qətiyyən. Çünki yorğunluğa qalsa, Kevin Medina, Bədavi Hüseynov, Maksim Medvedev, Qara Qarayev, Filip Ozobiç, Mahir Emreli, Kvabena Ovusu Larnakada Şahruddindən daha çox tər tökmüşdülər. Amma yenə də “Neftçi”yə qarşı görüşdə də ilk “11-lik”də yer almışdılar.

Görünür, Qurbanov sonadək avrokuboklarda bir, yerli çempionatda başqa qapıçıya şans verməkdə israrlıdır. Bu isə özünü doğrultmur. Şahruddin ötən mövsüm ölkə çempionatında meydana çıxdığı 10 oyundan 8-də qapısını toxunulmaz saxlamışdı. Eləcə də cari mövsüm ilk turda “Sabah”la görüşü “sıfır”la başa vurdu. Bu halda nəyə görə, hansı əsasla “Keşlə” və “Neftçi” ilə görüşləri kənardan izləməlidi? Hətta deyilənə görə, “Qarabağ” əcnəbi qapıçı transfer etmək istəyir və komanda Avroliqanın qrupuna vəsiqə qazansa, bu keçid eallaşacaq. Qəribə deyilmi?

Göründüyü kimi, “Qarabağ”ın 1 həftə ərzində 2 zərbə almasında Qurban Qurbanovun sonradan səhv olduğu məlum olan seçimlərinin böyük rolu var. Amma gəl ki, Qurbanov haqda bir tənqidi cümlə belə oxuya bilməzsən. Sanki “Qarabağ”ın çalışdırıcısı toxunulmazdı və hansısa gözəgörünməz qüvvə onun səhv seçimlərindən, yanlış qərarlarından yazmağa imkan vermir. Gələcəkdə quizlərə düşəcək sualdı: o, hansı məşqçidir ki, komandası əvvəlcə elə də güclü olmayan rəqibə uduzaraq Çempionlar Liqası ilə vidalaşsa da, 3 gün sonra ölkə çempionatında öz meydanında əzəli rəqibinə uduzsa da, qətiyyən tənqid olunmadı? Hansı məşqçidi? Cavab?..

FUTBOLXEBER.AZ