“Sabah” geri çəkildi: Şakir Seyidov, Emil Qasımov və Elçin Mustafayev məşqlərə qatıldı

3 gənc futbolçu - Şakir Seyidov, Emil Qasımov və Elçin Mustafayevə qarşı qərəzsiz mövqe tutaraq onları əvəzedici heyətə göndərən “Sabah” rəhbərliyi geri addım atıb.

Futbolxeber.az saytının əldə etdiyi məlumata görə, adıçəkilən 3 futbolçu bu gündən “Sabah”ın məşqlərinə qatılırlar. Onlar əsas deyil, əvəzedici heyətin  hazırlığında iştirak edirlər.

Xatırladaq ki, Şakir Seyidov, Emil Qasımov və Elçin Mustafayev “Sabah”la yeni müqavilə imzalamağa tələsmədikləri üçün əvəzedici heyətə göndəriliblər. Əvəzedici heyət isə dünənə qədər məşqlərə başlamamışdı.

“Sabah” rəhbərliyinin tutduğu mövqe haqlı narazılığa səbəb olub. Xüsusən də son mövsüm “Sabah”ın əsas heyətində çıxış edən, gənclər yığmamızın aparıcı futbolçularından olan Şakir Seyidovun gələcək karyerasının riskə atılması etirazla qarşılanıb. Hətta dünən U-21 milli komandamızın baş məşqçisi Milan Obradoviç bununla bağlı “Report”a açıqlamasında demişdi: “Hazırkı durum məni qətiyyən razı salmır. Çünki Şakir Seyidov yığmanın liderlərindən biridir. Qarşıda Fransa seçməsi ilə oyunumuz var”.