“Nitsa”nın keçmiş üzvü “Sumqayıt”da

2020/2021 mövsümü üçün transfer çalışmalarını davam etdirən “Sumqayıt” FK daha bir futbolçunun keçidini reallaşdırıb.

Futbolxeber.az saytının klubun rəsmi Feysbuk səhifəsinə istinadən verdiyi məlumata görə, son mövsümü İran Yüksək Liqası təmsilçisi “Pars Jonoubi Jam” klubunda keçirən Azərbaycan əsilli Adəm Həmati ilə 1+1 illik müqavilə imzalanıb. 25 yaşlı yarımmüdafiəçi yeni komandasında “21” nömrəli formada çıxış edəcək.

Qeyd edək ki, Kanadanın “Toronto City” klubunun akademiyasının yetirməsi olan Adəm Həmati peşəkar karyerasına 2014-cü ildə Fransanın “Nitsa” klubunun əvəzedici heyətində başlayıb. Daha sonra isə İranın “Persepolis” klubuna keçən Adəmin son klubu “Pars Jonoubi Jam” komandası olub.