“Rəvan” hazırlığını davam etdirir

"Rəvan” Azərbaycan Premyer Liqasının 5-ci turu çərçivəsində "Sumqayıt” ilə qarşılaşdı. Futbolxeber.az-ın məlumatına görə, komandanın cari mövsüm ilk qələbəsini qazandığı görüşdən sonra baş məşqçi Vladislav Qədirovun istəyi ilə futbolçulara 2 günlük istirahət verilmişdi. Komanda üzvləri bu gündən yenidən hazırlığa başlayıb. "Bayıl Arena”da baş məşqçi Vladislav Qədirovun rəhbərliyi altında keçirilən məşq 2 hissəyə ayrılıb. Belə ki, hazırlığın əvvəli fiziki hazırlığın yüksəldilməsinə hesablanmış təmrinlərlə olub. Ardından isə futbolçular taktiki-texniki hazırlığa keçib. Toplu çalışmalar komanda üzvləri, xüsusən də yeni transferlər arasındakı qarşılıqlı anlayışı yüksəltməyə hesablanmış formada olub. Sevindirici məqam ondan ibarətdir ki, artıq Xuan Manuel Varea da fərdi məşqlərə başlayıb. Qolkiperlər isə qapıçılar üzrə məşqçi Kamil Qafarovun rəhbərliyi altında çalışıb.