“Qarabağ”ın legioneri: “Azərbaycan millisindən təklif almağım yalandır”

"Birmingem"də olarkən çox gənc idim, amma Yunanıstanda daha çox iş gördüm. İsraildə yaxşı təcrübə topladığımı düşünürəm. İndi də Azərbaycandayam. Bu mənim ən yaxşı şəxsi məqamlarımdan biridir".

Futbolxeber.az saytının məlumatına görə, bu sözləri "Qarabağ"ın futbolçusu Miçel Madera İspaniya mətbuatına müsahibəsində deyib.

İspaniyalı yarımmüdafiəçi Ağdam klubu ilə müqaviləsinin davam etdiyini xatırladaraq qarşıdakı məqsədlərindən danışıb: "Artıq 5 ildir Azərbaycandayam və "Qarabağ"la hələ daha bir illik müqaviləm var. Hazırda çempionatda liderik və yenidən Çempionlar Liqasında mübarizə aparmağa çalışırıq. Amma burada qrupa düşmək daha çətindir. Çünki bunun üçün 4 mərhələ keçməlisən".

Miçel Azərbaycan yığmasından təklif alıb-almaması ilə bağlı sualı da cavablandırıb. O, bu barədə yazılanaları oxuduğunu, ancaq belə bir təklif almadığını deyib: "Belə bir şey oxudum, amma yalandır. Heç vaxt milliləşdirmə təklifi olmayıb".

Qeyd edək ki, Miçel 2015-ci ildən "Qarabağ"da çıxış edir.