“Qəbələ”nin əvəzolunmazları: Qismət Alıyevlə Davit Volkov

Azərbaycan Premyer Liqasında 2019/20 mövsümünün ilk yarısı başa çatıb.

Futbolxeber.az saytının məlumatına görə, “Qəbələ” ilk iki dövrədə keçirdiyi 14 oyunda 13 xal toplayıb. Komandanı ilk üç turda meydana çıxaran Sənan Qurbanov və sonradan onu əvəzləyən Elmar Baxşıyev bu qarşılaşmalarda 21 futbolçunun xidmətindən yararlanıb.

İki oyunçu - Qismət Alıyevlə Davit Volkov “qırmızı-qaralar”ın çempionatakı bütün görüşlərində iştirak edib. Klubun yetirməsi olan Qismət meydanda daha çox dəqiqə keçirməklə komandanın bu göstəricidəki lideri olub - 1211 dəqiqə. Amin Seydiyev, Ülvi İsgəndərov, Merab Qiqauri və Fernan Lopez hərəyə 13 matçda forma geyinib. 13 futbolçu oyunların yarıdan çoxunda - ən azı 8 dəfə meydanda olub.

“Qəbələ”nin mövsümün ilk yarısında vurduğu 14 qola 6 futbolçu imza atıb. 5 dəfə fərqlənən Davit Volkov komandanın ən yaxşı bombardiridir. Ülvi İsgəndərov, Rövlan Muradov və Fernan Lopez hərəyə 2 qola sevinib. Qismət Alıyevlə Roman Hüseynovun hərəyə bir topu var. “Qəbələ”nin bir qolu isə avtoqola imza atan Donald Geryenin (“Neftçi”) hesabına yazılıb (gabalafc.az).