"Qarabağ"ın oyununa baxa biləcəyik?

Avqustun 8-də "Qarabağ" Avroliqanın III təsnifat mərhələsinin cavab oyunu çərçivəsində səfərdə İsveçin "Gefle" klubunun qonağı olacaq. Futbolxeber.az-ın məlumatına görə, qarşılaşmaya 3 gün qalmasına baxmayaraq, matçın ölkəmizdə canlı olaraq yayımlanıb-yayımlanmayacağı hələ bəlli deyil. "Qarabağ" rəhbərliyi yayımı təşkil etmək üçün əlindən gələni edir. Klubun meneceri Asif Əsgərov da hazırda İsveçdədir. Lakin kanallardan heç biri matçı yayımlamaq üçün Ağdam klubuna müraicət etməyib. Bu səbəbdən də azərbaycanlı futbolsevərlərin matça baxa biləcəkləri sual altındadır. Əgər, İsveç kanallarından hansısa biri qarşılaşmanı canlı yayımlasa, o zaman oyun ölkəmizdə də göstərilə bilər. Bu zaman isə bütün xərcləri "Qarabağ" çəkəcək. Qeyd etdiyimiz kimi, yerli kanallar taleyüklü matça qeyri-ciddi yanaşırlar. Yox, "Gefle" - "Qarabağ" matçını İsveç kanalları da yayımlamasalar, o zaman çətin ki azərbaycanlı azarkeşlər televiziya vasitəsi ilə oyuna tamaşa edə bilsinlər.