"Gefle"nin qapıçısı: "Cavab görüşündə qalib gəlməyə borcluyuq"

Dünən Avroliqanın III təsnifat mərhələsinin ilk oyunu çərçivəsində Bakıda "Qarabağ"a 0:1 hesabı ilə uduzan İsveçin "Gefle" klubunun qapıçısı Matias Huqosson görüş barədə danışıb. Futbolxeber.az-ın məlumatına görə, 29 yaşlı qapıçı bəxtlərinin gətirdiyini etiraf edib: "Qapımız önündə yaranan qol imkanlarını nəzərə alsaq, 0:1 hesablı məğlubiyyətə görə şükür eləməliyik. Biz Bakıda gözlədiyimizdən də qat-qat aşağı səviyyədə oynadıq. İndi avqustun 8-də keçiriləcək cavab görüşündə qalib gəlməyə borcluyuq. Əlbəttə ki, ilk matçın nəticəsi rəqib üçün üstünlükdür. Şübhəsiz ki, bizim də şanslarımız var. Amma istənilən halda, məğlubiyyətə görə təəssüflənirik. Bu qədər uzun vaxt müdafiədə oturanda qol buraxmaq ehtimalı böyüyür. Elə təsir edən məqam da odur ki, bu qədər əziyyətdən sonra matçın sonlarında qol buraxırsan”.