Şəhriyar Əliyev: "Bu haqda qərarı klubun həkimi verəcək"

"Ayağımdakı gips gələn həftənin birinci günü açılacaq. Əvvəl demişdilər ki, ayın 29-u açılacaq. Amma sonra həkimlər bildirdilər ki, ayağım daha bir həftə gipsdə qalmalıdır". Futbolxeber.az saytına verdiyi açıqlamada bu sözləri "Bakı"nın müdafiəçisi Şəhriyar Əliyev deyib.

Gənc müdafiəçi hazırda özünü yaxşı hiss etdiyini bildirib: "Heç bir problem yoxdu. İndi də gipsimi aça bilərdilər. Amma bu halda gələcəkdə problemlə üzləşə bilərdim. Bu səbəbdən də həkimlər ayağımın daha 1 həftə gipsdə qalmasını istədilər".

Ş.Əliyev "Məşqlərə nə vaxt başlayacaqsan" sualını belə cavablandırıb: "Gips açılandan sonra əvvəlcə müəyyən müddət trenajor zalında çalışacağam. Meydana nə vaxt çıxacağım hələ bəlli deyil. Bu haqda qərarı klubun həkimi verəcək. Meydana qayıtmağım daha çox zədəmin bərpasından asılıdır".

Avstriya toplanışından kənarda qalan Şəhriyar artıq "Bakı"nın yeni baş məşqçisi Milinko Pantiçlə tanış olduğunu bildirib: "Pantiçlə hələlik bir dəfə görüşmüşük. Zədəm haqda, məşqlərə nə vaxt başlayacağımla maraqlandı. Hələ ki onun məşqlərini izləməmişəm".