Millimizin debütantı: “Oynayacağıma ümidli idim”

"Həqiqətən milliyə dəvət alanda çox sevinmişdim. Çünki millidə oynamaq, orada yer almaq hər bir futbolçu üçün gözəl hisslərdi".

Bu sözləri Futbolxeber.az saytına açıqlamasında millinin toplanışında iştirak etmiş Slavik Alxasov deyib.

Qırğızıstan, Qazaxıstan və Latviya ilə oyunlar üçün milliyə dəvət olunan Alxasov heç bir oyunda iştirak etmədi. Futbolçu özü də milli formada meydana çıxacağına ümid edirmiş:

"Düzdü, heç bir oyunda meydanda olmadım. Ancaq düzünü desəm, oynayacağıma ümidli idim. Amma bu dəfə milli formanı geyinmək mənə qismət olmadı. Bu, Qurban Qurbanovun fikri idi. Onun qərarına da hörmətlə yanaşıram. Qarşıdakı toplanışlara dəvət olunub-olunmayacağımı zaman göstərəcək. Bir az çətin görünür, amma ümid həmişə var".

"Millətlər Liqasında qrup lideri olmaq üçün əlimizdən gələni edəcəyik. Təbii ki, şansımız var. Liderlik üçün sona kimi mübarizə aparacağıq" - deyə, Slavik Alxasov fikirlərini yekunlaşdırıb.