“Sumqayıt”ın kapitanı: “Onların bizə köməyi çox dəyəcək”

"Həm Elvin Məmmədov, həm də Əfran Ismayılov təcrübəli futbolçulardı. Inanıram ki, onların bizə köməyi çox dəyəcək".

Bunu Futbolxeber.az saytına açıqlamasında "Sumqayıt"ın kapitanı Vurğun Hüseynov deyib.

O, "Sumqayıt"ın strategiyasının dəyişdiyini bildirib: "Gedən oyunçularımız da təcrübəli futbolçular idi. Gənc və təcrübəli futbolçularla  vəhdət təşkil edib yaxşı komanda formalaşdıracağıq. Düşünmürəm ki, strategiya dəyişəcək. Gənclər də çox olacaq yəqin.

Bizim komandanın strategiyası var, ancaq yerlilərlə oynamaq. Bizim də işimiz çıxıb adımıza layiq futbol oynamaqdı. Yeni gələnlər də lazımınca kömək edəcəklər bizə".

"Sumqayıt"da olduğu müddətdə "Neftçi" və "Qəbələ" ilə adı hallanan Samir Abasov sonda heç bir kluba keçəsi olmadı. Vurğun Hüseynov Abasovun işsiz qalmayacağına inandığını dilə gətirib: "Samir müəllimin köməkçisi Seymur müəllimlə danışıram. Açığı, gözləmirdim ki, Samir Abasov klubsuz qalsın. Ancaq Samir müəllimə tələbat olacaq. Çünki o, kənarda qalası məşqçi deyil".