"Rəvan" 3 futbolçu ilə müqavilə imzalayacaq

"Rəvan” cümə günü Sloveniyadan vətənə döndükdən sonra baş məşqçi Ramil Əliyevin istəyi ilə futbolçulara ikigünlük istirahət verilmişdi. Futbolxeber.az-ın məlumatına görə, bu gün komanda yenidən bir araya gəlib.

"Bayıl stadionu”nda baş tutan məşq həm də Premyer Liqanın ilk turu çərçivəsində keçiriləcək "Simurq” ilə oyuna hazırlığın startı anlamına gələ bilər. Belə ki, "Rəvan” məhz bu gündən sırf Zaqatala təmsilçisi ilə oyunun hazırlıqlarına başlayıb.

Ənənəvi isinmə hərəkətlərindən sonra yetirmələrini daha çox taktiki cəhətdən hazırlayan baş məşqçi toplu çalışmalara üstünlük verib. Təktoxunuşlu ötürmələr, "kvadrat”, standart vəziyyətlər, qapıya zərbələr və s. komponentlər məşqin tərkib hissəsinə daxil idi.

Qeyd edək ki, komandada zədəli futbolçu yoxdur. Düşərgədə olan yeni futbolçular - İvan Pexa, Kamil Nurəhmədov və Elnur Abdulov da məşqdə fəal iştirakı ilə yadda qalıb. Hər üç futbolçu məşqçilər korpusunun etimadını doğrultduğundan onlarla yaxın günlərdə rəsmi müqavilə də imzalanacaq.