AFFA prezidenti: "Foqts barədə müqavilə başa çatandan sonra danışarıq"

AFFA-nın prezidenti Rövnəq Abdullayev "Xəzər Lənkəran" - "Fənərbaxça" yoldaşlıq oyunu (0:4) haqda danışıb. Futbolxeber.az-ın məlumatına görə, AFFA prezidenti komandalar arasındakı səviyyə fərqini izah edib: "Belə oyunlar Azərbaycan futbolu üçün çox faydalıdır. Fikrimcə, bu gün səviyyə fərqi öz sözünü dedi. Ümid edək ki, bizim futbolçular da nə vaxtsa onların səviyyəsinə çatacaqlar".

R.Abdullayevin sözlərinə görə, "Xəzər Lənkəran"ın Avroliqanın II təsnifat mərhələsinin "Makkabi" (Hayfa) ilə cavab oyunu ərəfəsində belə qarşılama keçirməsi yaxşı haldır:  “Xəzər Lənkəran”ı “Makkabi” ilə həqiqətən də vacib oyun gözləyir. Amma futbolçulara təcrübə qazanmaq da lazımdı. Belə oyunlar komandaya kömək etməlidir. İsraillilərlə oyunöncəsi bundan gözəl məşq ola bilməzdi. "Xəzər Lənkəran"ın III təsnifat mərhələsinə keçmək üçün hələ şansı var".

 AFFA prezidenti milli komandamızın baş məşqçisi Berti Foqtsun gələcək taleyi haqda da sualı cavablandırıb: "Foqtsla hələ ki, ilin sonuna qədər müqaviləmiz var. Bu barədə müqavilə başa çatandan sonra danışarıq".