Ozobiç: “Elə oynamalıyıq ki, sanki hesab 0:0-dır”

“Qəbələ”nin yarımmüdafiəçisi Filip Ozobiç ölkə kubokunun 1/4 final mərhələsinin “Səbail”lə cavab oyunu ərəfəsində Qol.az saytına müsahibə verib. Futbolxeber.az saytı həmin müsahibəni təqdim edir:

- İlk oyunda 1:0 hesablı qələbə qazandınız. Cavab matçı haqda nə düşünürsən?

- Bilirik ki, bizi çətin oyun gözləyir. Çünki 1:0 hesablı nəticə turu keçmək üçün kifayət etməyə bilər. Kubok oyunları fərqli olur. Cavab matçına da ciddi hazırlaşırıq. Növbəti mərhələyə çıxmaq üçün əlimizdən gələni edəcəyik. Elə oynamalıyıq ki, sanki hesab 0:0-dır.

- Bir müddət zədəli olsan da, qayıdışın əla alındı. Ardıcıl qollar vurmağa başladın. Özünü tam hazır hesab edirsən?

- Əlbəttə ki, yox. Hələ ideal formamı yığmamışam. Tam hazır olduğumu deyə bilmərəm. Bunun üçün çox çalışmalıyam. Fasilədən maksimum yararlanmağa çalışacam. Yəqin ki, toplanışdan sonra 100 faiz hazır olacam.

- Mövsümün yarısı geridə qaldı. Komandanın çıxışını necə dəyərləndirirsən?

- Yayda “Qəbələ”də heyətlə bağlı ciddi dəyişikliklər oldu. Buna görə də müəyyən qədər çətinliklər yaşadıq. Komandaya vaxt lazım idi. İndi isə hər şey qaydasına düşüb. Artıq futbolçular bir-birilərini yaxşı başa düşürlər. Bunun nəticəsidir ki, komanda baxımlı futbol sərgiləyir.

- Fasiləyə “Qarabağ”dan 6 xal geridə yollandınız. Bu fərq qarşısına çempionluq hədəfi qoymuş komandanı narahat etmir?

- Təbii ki, narahat etmir. Çünki çempionat uzundur. Qarşı dahələ çox oyun var. Düşünürəm ki, vəziyyəti dəyişmək üçün vaxtımız olacaq. Sadəcə, ikinci dövrədə daha diqqətli olmalıyıq ki, xal itkilərimiz az olsun.