"Foqts bizim komandalar üçün “uyğun” olmayan oyunçuları Azərbaycan millisinə çağırır”

Azərbaycan milli komandasının baş məşqçisi Berti Foqts vətənində alman məşqçilərə Türkiyə milli komandalarına çağırılmayan türk əsilli futbolçuları diqqətdə saxlamağı tapşırıb. Futbolxeber.az-ın məlumatına görə bu haqda Türkiyə mətbuatı məlumat yayıb. "Foqts hazırda Türkiyə milliləri üçün hazır olmayan və Almaniyada yaşayan türk oyunçuları Azərbaycan millilərinə cəlb etməyə başlayıb. Beləliklə, türkiyəli məşqçilər Almaniyada istedadlı gəncləri axtardığı zaman qardaş ölkə bizim komandalar üçün “uyğun” olmayan oyunçuları Azərbaycan millisinə çağırır” - deyə məlumatda bildirilir.

"Fanatik" qəzeti yazıb ki, Foqts son olaraq “Vehen Viesbaden”də çıxış edən türk əsilli futbolçu Benhür Kayanı Azərbaycan U-16 millisinə cəlb edib. O, Bakıda keçirilən “Caspian Cup” turnirində də iştirak edib. Turnirdə yüksək səviyyəli oyunu ilə seçilən Kaya finalda  Türkiyəyə 1:4 hesabı ilə uduzduqları oyunda komandasının yeganə qoluna imza atıb.

Azərbaycan millisinə çağırılması haqda danışan B.Kaya deyib: “Türkiyə millisinə qarşı oynamaq mənim üçün çətin oldu. Bir millət, iki dövlət olduğumuz Azərbaycandan təklif gələndə fikirləşmədən qəbul etdim. İlk dəfə formasını geyindiyim komanda üçün mübarizə apardım. Berti Foqts Almaniyada mənim oyunumu izlətdirirmiş. Türkiyə millisindən bugünə qədər təklif gəlmədiyini görəndə Azərbaycanın dəvətini qəbul etdim” – deyə o vurğulayıb.