"Qismətimizdə qol vurmaq yox imiş"

"Ötən mövsüm APOEL-lə də evdə 1:1 oynamışdıq. Amma səfərdə 3:1 hesabıyla qalib gəldik. Əminəm ki, biz bu mərhələni keçəcəyik". Futbolxeber.az-ın məlumatına görə, bu sözləri "Neftçi"nin baş məşqçisi Böyükağa Hacıyev deyib.

Təcrübəli mütəxəssis ənənəsinə sadiq qalaraq, yenə də qeyri-adi açıqlamalar verib: "İddiam davam edir. Rəqib meydanda futbol oynamaqdansa, hospital açmışdı. “Skenderbeu” heç bir cəhətdən “Neftçi”dən üstün ola bilmədi. Bu gün qismətimizdə qol vurmaq yox imiş. Sadəcə top qapıdan keçmirdi. Yeni transferimiz Platyen qol vurmaq üçün çox çalışdı. Ona bildirmişdim ki, Azərbaycan azarkeşləri ilk oyundan sənə qiymət verəcəklər. Təkcə birinci hissədə 30 dəfə fərqli hücum etmişik. Həm də rəqib sırf müdafiə olundu. Biz də əlimizdən gələni etdik. Ən çox qorxduğumuz rəqibin bizi əks hücumda tutması idi. Mən qətiyyən narahat deyiləm. Çünki komandamın oyununa baxanda gördüm ki, tam hazırdır".