"Simurq" Avstriya toplanışına start verdi

"Simurq" hazırlıqların üçüncü mərhələsinə start vermək üçün Avstriyaya gəlib. Futbolxeber.az-ın məlumatına görə, Tirol şəhərində yerləşən "Kayzer" otelində məskunlaşan "Simurq" axşam saatlarında dörd günlük istirahətdən sonra məşqləri bərpa edib. Əvvəlcə baş məşqçi Georgi Çixradze yetirmələrini ətrafına toplayaraq onlarla ənənəvi qısa söhbət aparıb. Qarşıdakı hazırlıq proqramı haqqında məlumat verən gürcü mütəxəssis, futbolçularına çempionatın başlanmasına az bir vaxtın qaldığından tam gücləri ilə çalışmalarını tapşırıb və qeyd edib ki, təlim-məşq toplanışının bu mərhələsi əsasən taktiki tapşırıqların yerinə yetirilməsindən ibarət olacaq. Ancaq yorğunluq nəzərə alınaraq bərpa xaraqterli məşqin keçiriləcəyini bildirib.

Bundan sonra isə məşqə start verilib. Qaçış və isinmə hərəkətlərindən sonra 2 qrupa bölünərək "kvadrat"la hazırlıq davam edib. Sonda isə kiçik qapılarda ikitərəfli oyunla məşq tamamlanaraq futbolçulara istirahət verilib.

Qapıçılar Pavel Kapsa, Amil Ağacanov və Rəşad Əzizov isə qapıçılarla işləyən məşqçi Emil Babayevin rəhbərliyi altında komandadan ayrı çalışıb.

Ötən mövsüm "Simurq"la müqaviləsinin müddəti bitdiyinə görə Zaqatala təmsilçi ilə yollarını ayıran Stepan Polyak isə yenidən "Simurq"a dəvət edilib. Artıq təcrübəli futbolçu komanda ilə məşqədə çıxıb.