"Rəvan" yenə AZAL qarşısında aciz qaldı

Yeni mövsümə hazırlıqlarını davam etdirən "Rəvan” dünən növbəti yoxlama oyununu keçirib. Futbolxeber.az-ın məlumatına görə, "Rəvan" AZAL və "Qaradağ Lökbatan”la görüşlərdən sonra yenə AZAL ilə üz-üzə gəlib. "Təyyarəçilər”lə ilk matç Şüvəlan qəsəbəsində baş tutmuşdusa, bu dəfə oyun "Bayıl stadionu”nda keçirilib.

"Rəvan"ın baş məşqçisi Ramil Əliyev ilk dəqiqələrdən bu futbolçuları meydana buraxıb: Lukaş Sapela - Orxan Lalayev, Yovan Vidoviç, Şəhriyar Rəhimov (k), Yamin Ağakərimzadə - Ceyhun Cavadov, Miloş Adamoviç - Elvin Həsənəliyev, Kamil Nurəhmədov, Ayaz Mehdiyev - Xuan Manuel Varea. İkinci hissədə isə Ramazan Abbasov ilə Cəmil Rəhimli meydana çıxdı.

Oyun "Rəvan"ın ərazi üstünlüyü ilə başladı. Topa sahibolmada rəqibi xeyli üstələyən "aslanlar” meydanboyu gözəl kombinasiyalar qururdu. Amma heç cür son zərbəni vurmaq olmurdu. Elvin və Kamilin cəhdlərindənm sonra top "çərçivə”dən yan keçdi. Rəqibin əks-hücumları da ara-sıra təhlükəli alınırdı. Sadəcə, Sapela da etibarlı oynayırdı. Amma fasilədən dərhal sonra AZAL ani əks-hücum sonrası Əziz Korr Nyanq ilə hesabı açdı. Bu həm də matçda vurulan yeganə qol oldu.