“Zirə” qələbə ilə başladı

“Zirə” Türkiyədəki hazırlıq mərhələsi çərçivəsində ilk yoxlama oyununu keçirib. 

 

Futbolxeber.az-ın məlumatına görə, “qartallar” Qırğızıstan təmsilçisi “Dordoy”la (Bişkek) qarşılaşıb. Baş məşqçi Ayxan Abbasov start heyətində Kamal Bayramov, Yovan Krneta, Sadiq Quliyev, Adil Nağıyev, Aleksandr Şemonayev, Tural Cəlilov, Vüqar Mustafayev, Milan Duriç, Elvin Məmmədov, Sezar Meza Kolli və Elgün Nəbiyevi meydana buraxıb.

 

Qarşılaşmanın ilk dəqiqələrindən zirəlilər oyuna nəzarəti ələ alsa da, qol rəqibdən gəlib. İlk yarı Qırğızıstan təmsilçisinin üstünlüyü ilə başa çatıb. Fasilədən sonra isə Bakı təmsilçisində dəyişiklik edilib. Anar Nəzirov, Təmkin Xəlilzadə, Viktor İqbekoyi, Yamin Ağakərimzadə, Vüsal İsgəndərli, Cavid Tağıyev və Nurlan Novruzov daxil oldu. Yalnız Sadiq, Yovan, Adil və Vüqar oyunu əvəzolunmadan keçirib.

 

“Qartallar” ikinci hissədə istəyinə nail olub. Əvvəlcə Milan Duriç cərimə zərbəsi ilə baxımlı qola imza atıb. 75-ci dəqiqədə isə Vüqar Mustafayev fərqlənib – 2-1.

 

Qeyd edək ki, “Zirə” yanvarın 22-də Bolqarıstanın “Lokomotiv” (Qorna) klubu ilə üz-üzə gələcək.