"Rəvan" məşqlərini davam etdirir

"Rəvan” yeni "futbol ili”nə hazırlığını davam etdirir. Futbolxeber.az-ın məlumatına görə, komanda sabah AZAL ilə yoldaşlıq görüşündə qüvvəsini sınayacağından bu gün məşq yüngül xarakterli oldu. Buna həm də komandanın dünən fiziki cəhətdən tam yüklənməsi də təsir etdi. Axı axşam məşqində komanda trenajor-zalda hazırlaşmışdı. Dünənki səhər çalışmasında isə ikitərəfli oyuna da vaxt ayrılmışdı. Bir sözlə, baş məşqçi Ramil Əliyev ilk hazırlıq matçı ərəfəsində yetirmələrini çox yormaq istəmədi.

Yeri gəlmişkən, şərti olaraq, "qırmızılar” və "yaşıllar”ın mübarizə apardığı ikitərəfli oyunda birincilərin 1:0 hesabı ilə qalib gəldiyini və yeganə qolu debütant Ceyhun Cavadovun başla vurduğunu bildirək. Başqa sözlə, Ceyhun artıq komandada qol hesabını açıb.

Bugünkü məşqə gəlincə, təxminən saatyarım davam edən hazırlıq toplu çalışmalar üzərində idi. Baş məşqçi yeni transferlərə və düşərgəyə baxışa gələn təzə futbolçulara komandanın oyun fəlsəfəsini aşılayırdı. "Kvadratlar”, təktoxunuşlu ötürmələr, qapıya zərbələr və s. kimi komponentlərin yer aldığı hazırlıqda futbolçuların yüksək ab-havada olduğu sezilirdi.