“Mən 2005-ci ildəki Şahin Diniyev deyiləm”

“Meydança çox ağır idi. Belə şəraitdə oynamaq çətindir. Texnikalı oyun göstərmək olmur. Ağır qarşılaşma alındı. “Neftçi” də müqavimət göstərdi. Taktiki cəhətdən səmərəli oynadıq. İlk 5 dəqiqəni çıxmaq şərti ilə taktiki baxımdan ağıllı oynadıq və layiqli qələbə qazandıq”.

Futbolxeber.az saytının məlumatına görə, bu sözləri “Kəpəz”in baş məşqçisi Şahin Diniyev Topaz Premyer Liqasının 13-cü turunda “Neftçi”ni 2:0 hesabı ilə məğlub etdikləri oyundan sonda deyib.

Daha sonra təcrübəli mütəxəssis jurnalistlərin suallarını cavablandırıb.

- Bu gün qələbədən zövq ala bildiniz?

- Zövq almaq çətindir. Heyətimiz, büdcəmiz kasaddır. Son oyunlara itkilərlə çıxırıq. Bu gün futbolçular meydanın hər qarışı uğrunda mübarizə apardılar. Onların gözündə istəyi gördüm. Bu gün bizim üçün vacib, 6 xallıq oyun idi. Bu, başlanğıcdır. Stabil oyun göstərə bilmirik. Çalışacağıq ki, qış fasiləsinə qədər maksimum nəticə qazanaq. Ötən tur “Qarabağ”a qarşı da pis oynanamamışdq. Hər dəfə fərqli heyətlə oynadığımızdan çətinlik çəkirik.

- Bu günlərdə baba olmusuz. Deyə bilərik ki, nəvənizin ayağı sizə və komandanıza düşərli oldu?

- Yeni Şahin Diniyev gəlir. Arzulayıram ki, nəvəmin həyatı mənimkindən pis olmasın. Komanda bu gün məni sevindirdi. Buna görə çox şadam. Qalib gələ bilməsəydik, sevinə bilməzdim.

- Oyundan əvvəl “Kəpəz” qalib gəlməsə, Şahin Diniyev istefaya göndəriləcək” xəbərləri yayılmışdı. Həqiqətən bu, “Kəpəz”dəki son oyununuz ola bilərdi?

- Mən 2005-ci ildəki Şahin Diniyev deyiləm. Rəhbərliyin hər qərarına hörmətlə yanaşıram. Allahım şahiddir ki işimdə təmizəm. Gəncə azarkeşləri çox şey istəyirlər. Bunda haqlıdırlar. Onlar hər oyunda komandanı dəstəkləyirlər. İşimi itirməkdən qorxmuram. Futboldan kənar amillərə fikir versəm, işləməyə dəyməz.

- “Neftçi”nin hazırki vəziyyəti futbol adamı kimi sizi narahat edir?

- Narahat edir. “Neftçi” artıq çətinlikləri arxada qoymalıdır. Amma bu proses uzanır. Komandada oyun nizam-intizamı var. Bəzi məqamlar var ki, klubun içində olanlar daha yaxşı bilir. İnanıram ki, “Neftçi” tezliklə bu vəziyyətdən çıxacaq.