"AZAL Arena"da gərginlik: Əhmədov söydü, Qriqorçuk qovuldu

Topaz Premyer Liqasının XI turu çərçivəsində AZAL öz meydanında “Qəbələ”ni qəbul edir. Futbolxeber.az saytının “AZAL Arena”da olan əməkdaşının verdiyi məlumata görə, qarşılaşmanın ilk dəqiqələri çox gərgin alınıb.

Matçın 11-ci dəqiqəsində İlqar Ələkbərov “Qəbələ”nin üzvü Filip Ozobiçə qarşı kobud oynayıb. Nəticədə hakim AZAL-ın futbolçusunu sarı vərəqə ilə cəzalandırıb. Ələkbərov yerdə olan rəqib futbolçuya yenidən kobudluq edib. Bunun ardınca isə Ozobiç söyüş söyüb. Başda Roman Qriqorçuk olmaqla “Qəbələ”nin ehtiyat oyunçular skamyasında olanlar hakimə və AZAL-ın futbolçusuna etirazlarını bildiriblər. Ukraynalı mütəxəssis Ələkbərovun meydandan qovulmasını tələb edib.

Az sonra meydanda yenidən gərginlik yaranıb. Bu dəfə diqqət mərkəzində baş məşqçilər olub. Tərlan Əhmədovun futbolçularını kobudluğa səsləməsi Qriqorçukun etirazına səbəb olub. AZAL-ın çalışdırıcısı ukraynalıya qarşı söyüş söyməkdən də çəkinməyib. Lakin matçın baş hakimi insidentə görə Roman Qriqorçuku meydandan uzaqlaşdırıb.

Qeyd edək ki, qarşılaşmada hazırda 0:0-dır.