“O vaxt “Şəmkir”ə futbolumuzun qaymaqları yığışmışdı” (MÜSAHİBƏ)

"Şəmkir”in qapıçısı Elşən Poladovun Futbolxeber.az saytına müsahibəsi

- I divizionun 8-ci turunda MOİK üzərində 1:0 hesablı qələbə qazandınız. Qarşılaşma barədə nə deyə bilərsiz?

- Oyunun ağır keçəcəyini əvvəldən bilirdik. 1 həftə yağan yağışlar qazonu pis vəziyyətə salmışdı. Amma uşaqlar oyuna çox yaxşı köklənmişdilər. Əlimizdən gələni edirik ki, turnir cədvəlində bizdən öndə komandalardan geri qalmayaq. Çətin də olsa, bu gün 3 xal qazandıq. Çalışacağıq ki, bu uğuru növbəti oyunlarda da davam etdirək.

- Cari mövsümdə “Şəmkir”in məqsədi nədir?

- Məqsədimiz Premyer Liqaya yüksəlməkdir. Düşünürəm ki, bu, tək bizim yox, digər komandaların da qarşısına qoyulan hədəfdir.

- Premyer Liqaya yüksəlmək baxımından şansınızı necə dəyərləndirirsiz?

- Rəhbərlik qarşımıza həmin hədəfi qoyub. Biz də məqsədə çatmaq üçün əlimizdən gələni edirik. Çalışırıq ki, bütün oyunlarda qalib gələk.

- Çoxları cari mövsümdə I divizionda səviyyənin xeyli yüksəldiyini deyir. Bu fikirlə razısız?

- Tam razıyam. Hal-hazırda Premyer Liqada 8 komanda çıxış edir. Bu səbəbdən də favoritlərin kimliyi böyük ölçüdə əvvəldən məlumdur. Amma I divizonda kollektivlərin sayı çoxdu. Deyərdim ki, 6 komandanın Premyer Liqaya yüksəlmək şansı var. Bu məqam da mübarizəni daha da gərginləşdirir.

- Əvvəllər rəqib qismində “Şəmkir”ə qarşı oynamısız. Həkim kollektivlə indiki “Şəmkir”i müqayisə etmək olar?

- Həmin dövrdə “Şəmkir” çox güclü idi. O vaxt komandaya Azərbaycan futbolunun qaymaqları yığışmışdı. İndiki komandamız da zəif deyil. Düşünürəm ki, zaman keçdikcə “Şəmkir” daha da güclənəcək.