Rahid Əmirquliyev: “Çalışacağıq ki, səfərdən də üç xalla qayıdaq”

“Bizim üçün çox çətin oyun keçdi. PAOK bu mövsüm rəsmi oyunlarda uduzmamışdı. Bu səbəbdən oyuna çox yaxşı hazırlaşmışdıq”. Futbolxeber.az saytının məlumatına görə, bu sözləri PAOK-la oyundan sonra “Qarabağ”ın yarmmüdafiəçisi Rahid Əmirquliyev deyib.

Təcrübəli futbolçu 2:0 hesabı ilə qalib gəldikləri oyunun həlledici olmadığını bildirib: “Deməzdim ki, PAOK-la oyun həlledici idi. Çünki qarşıda daha üç oyunumuz var. Bir tərəfdən də PAOK-a uduzsaydıq, şanslar azalırdı”.

Əmirquliyev vurduğu qolla bağlı sualı belə cavablandırıb: “Qapıçını keçmək istəyirdim. Sonradan gördüm ki, müəyyən boşluq var və zərbə endirdim”.  

O, cavab oyununda da qələbə qazanmağa çalışacaqlarını bldirib: “İndi qarşıda “Neftçi” ilə oyunumuz var. Artıq həmin matçı düşünməliyik. PAOK-la səfər görüşümüz çətin keçəcək. Amma çalışacağıq ki, səfərdən də üç xalla qayıdaq”.