“Qriqorçuk “Qarabağ”ı çox yaxşı təhlil etmişdi”

“Oyunun gərgin keçəcəyini əvvəldən də bilirdik. Son 3 ilin çempionuna qarşı oynayırdıq. Qarşılaşmaya yaxşı başladıq və ardıcıl 2 qol vurduq. Düşünürm ki, qələbəyə layiq idik”. Futbolxeber.az saytına müsahibəsində bu sözləri “Qəbələ”nin kapitanı Rəşad Sadiqov deyib.

Təcrübəli futbolçu Topaz Premyer Liqasının VII turunda “Qarabağ”ı 2:0 hesabı ilə məğlub etdikləri görüş barədə bunları söyləyib: “Qarabağ”ın zəif olduğunu deməzdim. Bizim kimi onlar da cümə axşamı Avroliqa oyununda iştirak ediblər. Baş məşqçimiz onları çox yaxşı təhlil etmişdi və bizə rəqibi irəlidə sıxmağı demişdi. Biz də elə etdik və bu da öz bəhrəsini verdi”.

Sadiqov qeyd edib ki, məqsədləri çempion olmaqdır: “Çempionluq üçün çalışırıq. Əlimizdən gələni edəcəyik ki, bunu reallaşdıraq. Komandamızın builki hədəfi məhz çempionluqdur”.