Millimizin hücumçusu "Xəzər Lənkəran"da

Almaniyada yay təlim məşq toplanışını davam etdirən “Xəzər Lənkəran” toplanışın üçüncü günündə planlaşdırılan yeganə məşqini səhər saatlarında keçirdi. Futbolxeber.az-ın məlumatına görə, fiziki çalışmalar üzərində başlayan hazırlıqda məşqçilər korpusu toplu və topsuz çalışmaların futbolçular tərəfindən yerinə yetirilməsinə nəzarət etdilər. Əsasən hazırlığın şən ab-havada keçməsi xüsusi qeyd olunmalıdır. Dünəndən düşərgəyə gələn yeni futbolçu, “Sumqayıt” klubunun və A milli komandamızın şərəfini qoruyan Pərdis Fərcad-Azad bu gün fərdi məşqlə komandanın sıralarına qoşuldu. Hücumçu mövqeyində çıxış edən iran əsilli futbolçu ilə tibbi baxışdan keçdikdən sonra münasibətlər rəsmiləşəcək. Sabah isə Con Bencamin Toşak futbolçulara istirahət verib. Komanda səhər saatlarında Münhen şəhərinə gəzintiyə çıxacaq.