Zaur Svanadze: “Belə davam etsək, çempionluq uğrunda yarışa bilərik”

Topaz Premyer Liqasının VI turunun açılış oyununda AZAL öz meydanında “İnter”ə 1:3 hesabı ilə uduzub. Futbolxeber.az saytının məlumatına görə, matçdan sonra “İnter”in baş məşqçisi Zaur Svanadzenin iştirakı ilə mətbuat konfransı keçirilib. Gürcü mütəxəssis ilk öncə oyun haqda danışıb:

- Oyun çətin keçdi. Demək olar ki, nəzarət bizim tərəfimizdə idi. Rəqib ilk hissədə heç nə ilə yadda qalmadı. İkinci hissədə qapımızda qol görsək də, qələbə qazandıq. Bu nəticədən razıyıq. Bundan sonra “Zirə” ilə oyuna hazırlaşacağıq.

- Klub rəhbərliyi dəfələrlə çempionq barədə düşünmədiklərini bildirib. “İnter”in qızıl medallar uğrunda yarışması üçün nə çatışmır?

- Hələ ki çempinat təzə başlayıb. Mövsümə uğurla start vermişik. Belə davam etsək, çempionluq uğrunda yarışa bilərik. Mövsüm uzundur. 2 aparıcı üzvümüz - Denis Silva və Adrian Skarlatake zədəlidir. Bu, bizim üçün ciddi itkidir. Hər şey qaydasında olsa, ilk “üçlük” uğrunda yarışmaq olar.

- Bu gün hücum xəttində Ağabala Ramazanov və Rauf Əliyevin tandemi əla alındı. Demək olar ki, Rauf Əliyev artıq tam formaya düşüb?

- Rauf bu cür çıxışını davam etdirsə, əminəm ki onu milliyə dəvət edəcəklər. Yığmanın baş məşqçisi də oyunları izləyir. Özü hər şeyi görür. İndi Rauf yaxşı çıxış edir. Oyununda irəliləyiş var.