Asif Məmmədov: “Uduzan komanda həmişə hakimdən narazı olur”

“Qəbələ”nin yarımmüdafiəçi Asif Məmmədov Futbolxeber.az saytına müsahibə verib.

- “Sumqayıt” üzərində 2:0 hesablı qələbə qazandınız. Görüşlə bağlı nə deyə bilərsən?

- Gördüyünüz kimi, oyun bizim üstünlüyümüz şəraitində keçdi. Amma qol gec gəldi. Yaxşı oynadıq. Xüsusən də ikinci hissədə. Layiqli qələbə qazandığımızı düşünürəm.

- İlk hissədəki uğursuz oyunu isti hava ilə əlaqələndirmək olar?

- Hava həqiqətən də isti idi. Bu da oyunumuza təsir göstərdi. Amma sonradan daha yaxşı oynadıq. Razıyam, ilk hissədəki inamsız oyunu isti ilə əlaqələndirmək olar.

- Ardıcıl oyunlardan sonra “Qəbələ”də yorğunluq yaranıb?

- Bu gün baş məşqçimiz bəzi aparıcı oyunçulara istirahət vermişdi. Start heyətində yeni adlar var idi. Ona görə də oyunumuzu yorğunluqla əlaqələndirmək olmaz.

- Fasilədə Roman Qriqorçuk sizə hansı tapşırıqları verdi?

- Həmişə kimi, öz tapşırıqlarını verdi. Bildirdi ki, daha çox hücum etmək lazımdır. Biz də onun tapşırıqlarını yerinə yetirməyə çalışdıq.

- Rəqib komanda hakimlərdən narazılıq etdi. Onların bu fikri nə dərəcədə həqiqətdir?

- Hakimlə bağlı nə deyim? Narazılıq ola bilər. Uduzan komanda həmişə hakimdən narazı olur. Bu barədə heç nə demək istəməzdim.

- “Qəbələ” artıq çempionatda vahid liderdir...

- Bəli, liderik. Lakin arxayınlaşmaq olmaz. Əsas oyunlarımız qabaqdadır. Nəsə demək üçün çox tezdir. Belə davam etmək lazımdır.