Samir Abasov: “Hakim bizim autu tez atmağımızda niyə maraqlıdır ki?”

“Oyunun bu cür alınacağını bilirdik. Əks-hücumlara üstünlük verirdik. Birinci hissədə hava şəraiti problem yaradırdı. İkinci hissədə qol vurmaq üçün kifayət qədər şansımız oldu. Amma sonuncu ötürmə çatmadı”. Futbolxeber.az saytının Qəbələyə ezam olunmuş əməkdaşının verdiyi məlumata görə, bu sözləri “Sumqayıt”ın baş məşqçisi Samir Abasov deyib.

Topaz Premyer Liqasında III turdan təxirə salınmış oyunda “Sumqayıt” səfərdə “Qəbələ”yə 0:2 hesabı ilə uduzub.

“Sumqayıt”ın çalışdırıcısı həmkarı barədə bunları söyləyib: “Əsəblər aşıb, daşır. Heç bir narazılığım yoxdur. Qriqorçuk da mənim kimi məşqçidir. O söyüş söyə bilər, mən yox? 30 nəfər kimlərəsə nəhlət oxuyursa, bir gün həmin adamlar bunun cavabını verəcəklər. Birinci qol ofsaytdan vurulmuşdu. Mən özüm də əsəbləşdim. Eyni epizodda bizim qapımıza cərimə zərbəsi təyin edirlər. Aut atan futbolçumuzu tələsdirir. Hakim bizim autu tez atmağımızda niyə maraqlıdır ki? Əsbləşdim, tribunaya göndərildim. Buna görə peşman deyiləm. “Qəbələ”ni udmaq istəyirdik. Hətta heç-heçəyə də məyus olacağdıq. Mənə məsləhət verən adam Qriqorçuk olmalı deyil”.

Samir Abasov heyətə bağlı problemlərə görə klub rəhbərliyindən narazılığını bildirib: “Çempionata bir sağ cinah müdafiəçii ilə başlayırıqsa, üstümüzə gəlməyə dəyməz. Bunun günahkarı kimdir? Bu sualı klub rəhbərliyinə verin. Mənə məsləhət verən adam Qriqorçuk olmalı deyil. Onun oyunçularına nələr dediyini hamı eşidir. Ofsaytdan qol vurulanda necə təmkinli olum? “Qəbələ”nin öz işçiləri dedi ki, qol ofsaytdan vurulub”.