Bernhard Lippert: “Dinamo”nun bəxti gətirdi”

“Dinamo”nun bu gün bəxti gətirdi. “Qəbələ”nin qapısında gördüyü hər iki qolda bəxt amili rol oynadı”. Futbolxeber.az saytının Qəbələyə ezam olunmuş əməkdaşına verdiyi açıqlamada bu sözləri AFFA-nın texniki direktoru Bernhard Lippert deyib.

UEFA Gənclər Liqasının Çempionlar yolunda ilk oyununda “Qəbələ” öz meydanında Moskva “Dinamo”suna 0:2 hesabı ilə uduzub.

Matçı stadiondan izləyən Lippert təmsilçimizin məğlubiyyətə layiq olmadığını bildirib: “Qəbələ” bu gün qol vura bilmədi. Ancaq komandanın futbolçuları özlərini yaxşı tərəfdən göstərdilər. Fərdi olaraq “Qəbələ”nin futbolçuları rəqibdən geri qalmırdılar. Düzdür, “Dinamo”nun futbolçuları fiziki cəhətdən daha güclü idilər. Əvəzində “Qəbələ”nin oyunçuları texniki cəhətdən yaxşı təsir bağışladılar. Ümumiyyətlə, “Qəbələ”nin oyun tərzini bəyəndim. Komanda qısa ötürmələrə üstünlük verirdi”.

“Qəbələ”nin heyətində hansı oyunçunun çıxışını daha çox bəyəndiniz” sualını alman mütəxəssis belə cavablandırıb: “Bəlkə də ad çəkməyim düzgün çıxmaz. “Qəbələ”nin heyətində perspektivli futbolçuların sayı çoxdur. Onların əksəri U-19 millimizin üzvüdür. Roman Hüseynovu fərqləndirmək olar. O, artıq “Qəbələ”nin əsas komandasında qol da vurub. İnanıram ki, uğurlu çıxışını davam etdirəcək. Eləcə də U-21-ə də dəvət alan Bəhlul Mustafazadəni, Fərid Nəbiyevi fərqləndirmək olar. Bir sözlə, heyətdə çoxlu perspektivli oyunçular var. Lakin onlar üzərlərində daha çox çalışmalıdırlar”.