“Kəpəz”in qapıçısı: “Bütün komandalar Sumqayıtda çətinlik çəkirlər”

“1:1 hesabı oyuna görədir. Meydana qələbə üçün çıxmışdıq. Qazanılan 1 xalı normal nəticə hesab edirəm”. Futbolxeber.az saytına açıqlamasında bu sözləri “Kəpəz”in qapıçısı Tadas Simaitis deyib.

Topaz Premyer Liqasının V turunda “Kəpəz” səfərdə “Sumqayıt”la heç-heçə oynayıb - 1:1.

Litvalı qolkiper qeyd edib ki, Sumqayıt səfərində xal qazanmaq bütün komandalar üçün çətindir: “Motivasiyamız yaxşı idi. Qələbə qazanmaq istəyirdik. Lakin nəzərə almaq lazımdır ki, “Sumqayıt” evdə yaxşı oynayır. Bütün komandalar Sumqayıtda çətinlik çəkirlər. Buradan xal aparmaq heç də asan deyil”.

Simaitis komandası qol vurduğu epizodda rəqib qapıçının səhv edib-etməməsi ilə bağlı sualı belə cavablandırıb: “Həmin epizodu tam dəqiqliyi ilə görə bilmədim. Amma hesab edirəm ki, “Sumqayıt”ın qapıçısı topu görmürdü. Bu isə bütün qapıçılara çətinlik yaradır”.