Ruslan Nəsirli: “Neftçi”nin futbolçusu komanda yoldaşımı söydü”

AZAL-ın yarımmüdafiəçisi Ruslan Nəsirli “Neftçi” ilə oyundan sonra Futbolxeber.az saytına müsahibə verib.

- Mövsümün ilk oyununda “Neftçi”yə 0:2 hesabı ilə uduzdunuz. Qarşılaşma barədə nə deyə bilərsən?

- Oyuna yaxşı başlamışdıq. İlk hissədə “Neftçi”dən daha təsir bağışladıq. Fasiləyə qədər 2-3 qol epizodumuz oldu. Lakin həmin epizodları dəyərləndirə bilmədik. Bəxtimiz gətirmədi. Eləcə də birinci hissədə azlıqda qaldıq. Mənim səhvim ucbatından. Heç nədən qırmızı vərəqə aldım. Bu da komandamızın oyununa təsir göstərdi.

- Qırmızı vərəqə aldığın epizodda hakimin qərarı haqlı idi?

- Hakim heç vaxt qərarını dəyişmir. Əgər qırmızı vərəqə göstəribsə, deməli bunu lazım bilib.

- Meydanı tərk edəndə çox aqressiv idin. Hiss olunurdu ki, qərardan narazısan...

- Bu, emosiyalardı. Bu haqda çox danışmaq istəmirəm. Sadəcə onu deyim ki, rəqib futbolçu komanda yoldaşımı söydü. Mən də onu itələyərək, belə sözlərin lazım olmadığını dedim. O isə yerə yıxıldı. Yekunda da hakim mənə qırmızı vərəqə göstərdi.

- Ümumiyyətlə, hakimlərin idarəçilyini necə dəyərəndirərdin?

- Hakimlərin işinə qiymət vermək istəməzdim.

- Oyundan sonra baş məşqçiniz Tərlan Əhmədov paltardəyişmə otağında nə dedi?

- Baş məşqçiin paltardəyişmə otağında dedikləri orada da qalmalıdır. Məncə bunun mətbuata çıxmasına ehtiyac yoxdur.