“Qarabağ”ın 112 yaşlı rəqibi

“Qarabağ” Avroliqanın pley-off mərhələsində İsveçin “Göteborq” komandası ilə qarşılaşacaq. İsveç klubu haqda ətraflı məlumatı təqdim edirik:

“Göteborq” İsveçin eyniadlı şəhərini təmsil edir. Klub 1904-cü ildə yaradılıb. Komandanın rəngləri mavi və ağdır. “Göteborq” ev oyunlarını 18.416 nəfərlik “Gamla Ullevi” stadionunda keçirir.

“Göteborq” 18 dəfə İsveç çempionu, 13 dəfə isə “Allsvensken” liqasının qalibi olub. Komanda 1981-82 və 1986-87-ci illər mövsümündə UEFA kubokunun qalibidir. Ötən mövsümü ikinci pillədə başa vuran rəqibimiz bu mövsüm isə 16 turdan sonra 29 xalla turnir cədvəlinin 4-cü pilləsində qərarlaşıb. Avropa Liqasına ilk mərhələdə "Göteborq" Uels təmsilçisi "Llandudno"nu iki oyunun nəticəsinə görə 7:1 hesabı ilə üstələyib, ikinci mərhələdə Polşanın "Piast" klubunu iki oyunun nəticəsinə görə 3:0 hesabıyla məğlub edib. III mərhələdə öz meydanında Finlandiyanın "Helsinki" klubuna 2:1 hesabıyla məğlub olan “Göteborq” səfərdə 2:0 hesablı qələbə qazanaraq pley-off-a vəsiqəni təmin edib.

Komandanın hazırki heyətində 12 isveçli, 3 norveçli, 3 danimarkalı, 1 islandiyalı, 2 qanalı və 1 boliviyalı futbolçu çıxış edir. Komandaya isə isveçli Yorgen Lennartsson rəhbərlik edir.