Yusif Həsənov: “Əsas məqsədimiz gənc futbolçuları inkişaf etdirməkdir”

“Bu gündən etibarən “Səbail” klubu öz fəaliyyətinə başlayır. Müşahidə Şurasının üzvləri ilə tanış oldunuz. Şurada yer alanların əksəri tanınmış simalardır. Klubumuzun gələcəyinin parlaq olacağına inanırıq”. Futbolxeber.az saytının məlumatına görə, bu sözləri yeni yaradılan “Səbail” klubunun Müşahidə Şurasının sədri Yusif Həsənov deyib.

Həsənov qeyd edib ki, klubun əsasını gənclər təşkil edəcək: “Əsas məqsədimiz gənc futbolçuları inkişaf etdirmək, milli komandalara hazırlamaqdır. Bu gün U-21, U-19, U-17-yə dəvət alan futbolçularn bir qismi yığmaya dəvət alsalar da, klublarında daim oynamaq imkanı qazanmırlar. Həmin oyunçular üçün klubumuzun qapısı açıqdır”.

Yusif Həsənov maddi baxımdan problem yaşamayacaqlarını bildirib: “Avqustda klubumuzun rəsmi saytı fəaliyyətə başlayacaq. O zaman maddi məsələlərlə bağlı bütün suallara sayt vasitəsi ilə aydınlıq gələcək. I divizionda iştirak üçün lazım olan bütün sənədləri PFL-ə təqdim edəcəyik. Bunun üçün lazım olan bütün işlər görülür”.