“Qarabağ” bu gün Albaniya çempionu ilə qarşılaşacaq

“Qarabağ” Avstriyada təlim-məşq toplanışını davam etdirir. Futbolxeber.az saytının məlumatına görə, komanda hazırlığın on dördüncü günündə iki məşqlə kifayətlənib. Günün ilk məşqi fitnes zalında baş tutub. Günün ikinci məşqi isə yerli vaxtla saat 18:30-da (Bakı vaxtı ilə 20:30) meydançada keçib. Çalışmalar bir saat yarım davam edib. Zədəli futbolçu Namiq Ələsgərov isə fiziyoterapevt nəzarəti altında hazırlığını davam etdirib. Bu, komandanın bu gün baş tutacaq "Şkenderbeu" ilə yoxlama oyunundan öncə son məşqi idi. 

Qeyd edək ki, Ağdam klubu Bakı vaxtı ilə saat 20:00-da son Albaniya çempionu "Şkenderbeu" ilə qarşılaşacaq.

Qurban Qurbanovun komandası ilk yoxlama görüşündə Avstriyanın "Vakker İnsbruk"a 0:1 hesabı ilə məğlub olub, ikinci hazırlıq matçında isə Rusiyanın "Zenit" klubuna eyni hesabla qalib gəlib (klub saytı).