Tale Heydərov: “Ötən mövsümlə müqayisədə daha yaxşı nəticə qazanmağa çalışmalıyıq”

“Qəbələ”nin prezidenti Tale Heydərov Futbolxeber.az saytına müsahibə verib.

- “Qəbələ” Avroliqanın I təsnifat mərhələsinin ilk oyununda “Samtredia”nı 5:1 hesabı ilə darmadağın etdi. Qarşılaşma haqda nə söyləyə bilərsiz?

- Belə hesab gözləmirdik. Çox sevindirici haldır ki, komandamız bu gün gözəl qələbə qazandı. Lakn hesab hər şey demək deyil. Ümid edirik ki, növbəti oyunlarda da belə oyun göstərəcəyik.

- Hesab ortadadır. Bəs, “Qəbələ”nin göstərdiyi oyun sizi qane etdi?

- Hesaba görə danışmaq asandır. Çox gözəl qələbə oldu. Növbəti oyunlarda komandanın çıxışı barədə daha dəqiq söz demək olar.

- Yeni transferlərin çıxışını bəyəndiniz?

- Bəyəndim. Amma daha çətin oyunlarda da onların güclərini yoxlamaq lazımdır. Yaxşı transferlərdir.

- Demək olar ki, bu gün oyunu rahat şəkildə izlədiniz?

- Bəli, bugünkü qarşılaşmanı rahat izlədim. İlk dəfə idi ki, belə hal yaşanırdı.

- Yeni transferlərin reallaşması mümkündür?

-  Hazırda bir hücumçu axtarırıq. Bu yaxınlarda keçid rəsmiləşməlidir.

- İlkin təsürat necədir, bu “Qəbələ” daha güclüdür, yoxsa ötənilki?

- Demək çətindir. Bu komanda ən azından ötənilkindən pis deyil. Ola bilsin daha yaxşıdır. Gələn oyunlarda bu suala daha dəqiq cavab vermək mümkündür.

- Komandanızın bu mövsümkü hədəfi nədir?

- Hədəf həmişə daha irəli getməkdir. Ötən mövsümlə müqayisədə daha yaxşı nəticə qazanmağa çalışmalıyıq.

- “Qəbələ”nin yenə Avroliqanın qrup mərhələsində oynayacağını gözləmək olar?

- Bəli, olar.

- Ötən mövsüm “Qəbələ” çempionatda istəyinə nail olmadı. Belə təəssürat yarandı ki, komandadan incimisiz. Komandanız Avroliqada bu mövsüm də uğur qazanmaqla həmin inamı qaytara bilər?

- Mənim komanda ilə bağlı hədəflərim hər zaman böyükdür. “Qəbələ” ötən mövsüm Azərbaycan çempionatında ümidləri doğrultmadı. İnanırıq ki, bu mövsüm vəziyyət fərqli olacaq.

- Büdcənin yenidən artırılması mümkündür?

- Büdcə bu mövsüm üçün azaldılıb.

- Bu, maliyyə problemindən irəli gəlir?

- Maliyyə probleminin də rol oynadığını söyləyə bilərik. Həm də hesab edirəm ki, qənaətlə də uğur qazanmaq olar.

- Maliyyənin azaldıması komandanın nəticəsinə təsir edə bilər?

- Rol oynaya bilər. Hazırda düzgün transferlər reallaşdırmağa çalışırıq. Keçən il bəzi transferlərimiz uğursuz oldu. Legioner seçimində daha effektiv olmağa çalışırıq.

- Bu gün ikinci hissədə “Qəbələ”nin öz yetirməsi olan gənclər də meydana çıxdılar. Düşünmək olar ki, zamanla komanda daha çox öz yetirmələrinə güvənəcək?

- Məşqçinin qarşısına hədəf qoyulub ki, zamanla heyətdə yerli və akademiyanın yetirmələrinin sayı artsın. Bu gün onlardan bəziləri meydançaya çıxdı. Zamanla onların sayı artacaq.