Məşqçilər Komitəsinin üzvləri “Bakı”nın bazasında I divizion klubları ilə görüşdü

AFFA-nın Məşqçilər Komitəsinin üzvləri bu gün I divizion klublarının nümayəndələri ilə görüş keçirib. Futbolxeber.az saytının məlumatına görə, “Bakı” Futbol Klubunun Təlim-Məşq Bazasında baş tutan görüşdə Məşqçilər Komitəsinin bütün üzvləri - Vaqif Sadıqov, Ağasəlim Mircavadov, Böyükağa Hacıyev və Şakir Qəribov iştirak edib.

Tədbiri giriş sözü ilə Vaqif Sadıqov açıb. Məşqçilər Komitəsinin rəhbəri daha əvvəl bölgələri təmsil edən I divizion klubları ilə Mingəçevirdə görüşdüklərini xatırladıb.

Daha sonra Məşqçilər Komitəsini digər üzvləri sıra ilə fikirlərini bildiriblər.

Ardınca söz klub nümayəndələrinə verilib. Öncə “Neftçala” rəhbərliyi söz alıb. Klub nümayəndələri növbəti mövsümdə Premyer Liqada çıxış etməyə hazır olduqlarını vurğulayıb. “Neftçala” kimi digər klubların nümayəndələri də onları narahat edən məsələləri Məşqçilər Komitəsi ilə bölüşüblər.

Tədbirdə son olaraq “Bakı”nın vitse-prezdenti Yaşar Seyidov çıxış edib. Seyidov qeyd edib ki, hazırda I divizion klubları Premyer Liqada iştirak üçün lisenziya tam hazır olmadığını vurğulayıb. “Bakı” rəsmisi həmçinin görüşdə səslənən fikirləri həyata keçirmək üçün İşçi Qrupunun yaradılmasının vacibliyini bildirib. Təklifə digər klub nümayəndələri də razılıq veriblər. Beləcə, qərara alınıb ki, tezliklə İşçi Qrupu yaradılsın. Bütün klublar təkliflərini yazılı şəkildə həmin qrupa təqdim etsinlər. Ən vacib təkliflər isə yekunda AFFA rəhbərliyinə verilsin.