“Neftçi”nin futbolçusundan etiraf: “Ümidimiz kubokadır”

“Neftçi”nin yarımmüdafiəçisi Rəhman Hacıyev “Zirə” ilə oyundan sonra jurnalistlərin suallarını cavablandırıb. Futbolxeber.az saytı R. Hacıyevin müsahibəsini təqdim edir:

- Qolsuz başa çatan oyun barədə nə deyə bilərsən?

- Oyun çətin keçdi. Meydana qələbə üçün çıxmışdıq. Biz hər oyuna ciddi hazırlaşırıq. Qələbə qazanmağı çox istəyirdik, lakin əlimizə düşən imkanları dəyərləndirə bilmədik. Qarşıda kubok oyunu var. Ümidimiz kubokadır.

- Yəni, “Neftçi”nin Avroliqaya çempionatdan yollanmaq şansının tükənmək üzrə olduğunu etiraf edirsən?

- Yox, belə deməzdim. Qarşıda hələ 5 tur var. Maksimum nəticə göstərsək, çempionatdan da Avroliqaya yollana bilərik.

- Lakin çempionatda vəziyyət ürəkaçan deyil. Demək olar ki, “Neftçi” artıq bütün ümidini kuboka bağlayıb?

- Belə baxanda, ümidimiz kubokdadır. Əlimizdən gələni edəcəyik ki, istəyimizə çataq.

- Ardıcıl 3 dəfə “Qəbələ” ilə qarşılaşacaqsınız. 8 gün ərzində 3 dəfə eyni rəqiblə qarşılaşmaq çətin olmayacaq ki?

- Çətin deyil. Normal haldı. Əvvəlcə kubokun ilk oyununu evdə keçirəcəyik. Daha sonra isə “Qəbələ” ilə səfərdə 2 oyuna çıxacağıq.

- Ola bilər ki, “Neftçi” çempionatdakı oyunda “Qəbələ”yə qarşı ciddi müqavimət göstərməyib, gücünü kuboka saxlasın?

- Yox. Biz bütün oyunlara qələbə üçün çıxırıq. Fərqi yoxdur, kubok oyunudur, ya çempionat.

- “Zirə” ilə görüşdə qələbə qazanmağınız üçün nə çatışmadı?

- Üstün olsaq da, yaxaladığımız imkanları boşa verdik. Ümid edirəm ki, “Qəbələ” ilə oyunlarda şanslarımızdan istifadə edəcəyik.

- Vəli Qasımovun gəlişindən sonra sanki əvvəlki kimi oynaya bilmirsən...

- Millinin heyətində toplanışa gedəndə sağlamlığımda problem var idi. 10-15 gün oynamadım. Bu da özünü göstərir. Ona görə də hazırda ideal formada deyiləm.

- Oyun praktikasının yoxluğundan əziyyət çəkirsən?

- Praktika deməzdiım. Sadəcə meydana çıxmağa hazır deyildım. “Zirə” ilə oyunda Vəli Qasımov mənə şans verdi, güvəndiyini dedi. Mən də meydana çıxıb, komandamın uğuru üçün əlimdən gələni etdim.