Erik Ramos: “Təəssüf ki, “Neftçi” əvvəlki gücünü sona kimi qoruya bilmədi”

“Neftçi”nin yarımmüdafiəçisi Erik Ramos “Zirə” ilə oyundan (0:0) sonra jurnalistlərin suallarını cavablandırıb. Futbolxeber.az saytının da əməkdaşının iştirak etdiyi müsahibəni təqdim edirik:

- “Zirə” ilə oyun barədə nə deyə bilərsən?

- Çox çətin oyun idi. Qarşılaşma ərzində əziyyət çəkdik. Təəssüf ki, qələbə qazana bilmədik. Bununla belə, inanırıq ki, gələcəkdə hər şey yaxşı olacaq. Qarşıda bizi “Qəbələ” ilə 3 oyun gözləyir. Düşünürəm ki, həmin qarşılaşmalarda sərfəli nəticə qazanacağıq.

- Çoxdandı mətbuatda görünmürdün. Bunun səbəbini bilirsən?

- Təbii ki, bilirəm. Çünki ispan dilli tərcüməçi yox idi (gülür).

- Bəs, adi həyatda tərcüməçinin olmaması sənə problem yaratmırdı?

- Bir az ingilis dilində başa düşürəm. Adi həyatda bu da bəs edir.

- Mövsümün sonunda “Neftçi”dən gedəcəksən. Bu məqam oyunlara köklənməyində problem yaratmır?

- “Neftçi”də 4 il keçirdim. Bu, yetərincə vaxtdır. Qarşıda məni başqa yol gözləyir. Heç kimlə problemim yoxdur. Sadəcə olaraq bu, şəxsi qərarımdır.

- “Neftçi”yə gəldiyin gündən komanda iddialı olub. Hazırkı durumun səbəbini nədə görürsən?

- Çox təəssüf ki, “Neftçi” əvvəlki gücünü sona kimi qoruya bilmədi. Amma komandanın gələcəkdə əvvəlki əzəmətini qaytaracağını düşünürəm.

- Bəs, “Neftçi”nin əvvəlki gücünü bu günə kimi qorumamasının səbəbi nədir?

- Problem proektin özü ilə əlaqədardır. Düz qurulmadığına görə, belə də problem yarandı. Hər dəfə komandaya yeni adlar, yeni oyunçular gəlir. Bu da komandanın çıxışına öz təsirini göstərir.

- Bu gün azarkeşlər I divizion klubunun adını çəkərək, “gözlə, “Neftçi” də aşağı liqaya gəlir” deyirdilər. Demək olar ki, fanatlar da artıq komandadan əllərini üzüblər?

- “Neftçi” özü də bu vəziyyətə düşmək istəməzdi. Gələcək 2 il ərzində durumun düzələcəyinə ümid edirəm.

- Son zamanlar Azərbaycanı tərk edən legionerlər öz vətənlərində ölkəmiz haqda mənfi fikirlər səsləndirirlər. Erik Ramos Paraqvayda Azərbaycanı necə xatırlayacaq?

- Mən heç vaxt Azərbaycan haqda pis danışa bilmərəm. Burada xeyli xoş xatirəm olub.