Robert Prosineçki: “Təkcə Ruslandan yox, bütün komandadan narazı qaldım”

Milli komandamızın baş məşqçisi Robert Prosineçki “Neftçi” - “Zirə” oyunundan (0:0) sonra jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəni təqdim edirik:

- Baxdığınız oyun barədə nə deyə bilərsiz?

- Oyundan tam razı qalmadım. Qolsuz qarşılaşma izlədik. Hiss olunurdu ki, “Zirə” 1 xal üçün oynayırdı. Komanda bacarığını tam göstərmədi.

- Hesabdan narazı qaldınız, yoxsa göstərilən oyundan?

- Hər ikisindən. 90 dəqiqə ərzində demək olar ki, “çərçivə”yə gedən zərbə görmədik.

- Son zamanlar “Neftçi”nin hücumçusu Ruslan Qurbanov daha çox tənqid olunur. Millinin baş məşqçisi kimi onun çıxışı sizi qane edir?

- Təkcə Ruslandan yox, bütün komandadan narazı qaldım. “Neftçi”nin potensialını nəzərə alaraq, komanda öz oyununu göstərmir. Mövsümün sonuna 5 tur qalıb. Üstəlik, kubok qarşılaşmaları da var.

- “Xəzər Lənkəran” - “Qəbələ” matçına televizor vasitəsi ilə olsa belə, tamaşa etdiniz?

- Həmin oyunu izləmişəm. Nəzərə alsaq ki, “Qəbələ” “Xəzər Lənkəran”a qarşı oynayırdı, deməli qonaq komanda potensialını tam göstərə bilməyib. “Qəbələ”dən daha çox şey gözləyirdim.

- Sizcə iddialı komandaların zəif çıxışının səbəbi nədir? Bunu yorğunluqla əlaqələndirmək olar?

- Həftədə 1 dəfə oynamaqla yorğunluqdan danışmaq olmaz. Çempionatın sonu olsa belə... Nədən yorulublar ki? Avropa ölkələrində komandalar həftədə 2 oyuna çıxırlar. Ona görə də yorğunluqdan şikayətlənmək düzgün deyil.

- Avstriya toplanışında millinin heyətində yeni ad görməyimiz mümkündür?

- Bilmirəm.

- Toplanış zamanı millimizin rəqiblərindən ikisinin adı məlumdur. Bəs, üçüncü rəqib hansı olacaq?

- Kanada və Makedoniya ilə qarşılaşacağıq. Kanada güclü rəqibdir. Makedoniya ilə də oyunumuz maraqlı olacaq. Lakin ilk matçımızı ayın 26-da keçirəcəyik. Rəqibin adı hələ məlum deyil, danışıqlar aparırıq. Ona görə də dəqiqləşmədiyi üçün indi ad çəkə bilmərəm.

- Almaniyada çıxış edən millimizin sabiq üzvü Rüfət Dadaşov son zamanlar məhsuldar oyun sərgiləyir. Hücum xəttindəki problemləri nəzərə alsaq, Dadaşova dəvət göndərməyi düşünürsüz?

- O, Almaniyanın beşinci liqasında çıxış edir. Ona dəvət göndərsəm, gərək burda çempionatı dayandıraq.