Anyete: “Bilirəm niyə jurnalistlər hər dəfə mənimlə danışmaq istəyirlər” (Müsahibə)

“Neftçi”nin hücumçusu Anyete “Qarabağ”a 1:2 hesabı ilə uduzduqları oyundan sonra jurnalistlərə müsahibə verib. Futbolxeber.az saytının əməkdaşının da iştirak etdiyi müsahibədə ispan futbolçu öncə mətbuat önünə çıxmaq istəməməsinə aydınlqı gətirib.

- Nəyə görə jurnalistlər önünə çıxmaq istəmirdiz?

- Bunun xüsusi bir səbəbi yoxdur. Komandamızın heyətində çox futbolçu var. Arada mətbuata danışırıq, arada isə yox.

- Bəlkə bu, məğubiyyətdən sonrakı təzyiqdən irəli gəlir?

- Heç bir problem yoxdur. Burdayam, istədiyiniz sualı verə bilərsiz.

- Mövsüm ərzində cəmi 1 qol vurmağınınız nədən irəli gəlir?

- Bilirəm niyə jurnalistlər hər dəfə mənimlə danışmaq istəyirlər. Uğursuz çıxışıma görə....Amma mən peşəkaram, burdayam. Cəmi 1 qol vurmağımla bağlı geniş danışmaq istəmirəm. Yalnız onu deyim ki, futbolda belə hallar olur. Ardıcıl 2 il 2 fərqli ölkədə bombardir olmuşam.  “Neftçi”də də əlimdən gələnin ən yaxşısını etməyə çalışıram.

- “Neftçi”dəki çıxışınızın uğursuz alınmasının səbəbi nədir?

- Səbəblər çoxdur. Problemlər də kifayət qədərdir. Mövsümün əvvəlində zədəm var idi. Sonradan yenə də xəsarət aldım. Üstəlik, komanda da yaxşı oynamır.

- Bu gün “Qarabağ”a uduzmağınıza səbəb nə oldu?

- Biz bu gün Azərbaycanın ən yaxşı komandasına qarşı oynadıq. Çalışdıq, döyüşdük. Lakin nəticə istədiyimiz kimi olmadı.

- Lazımi nəticəni qazanmağınıza “Qarabağ” imkan vermədi, yoxsa “Neftçi” zəif çıxış etdi?

- Hər dəfə uduzanda 2 səbəb olur. Bir - sən rəqibdən zəifsən, iki - rəqib səndən güclüdür.

- “Qarabağ”ın heyətində hansısa futbolçunu fərqləndirə bilərsiz?

- Kimisə fərqləndirə bilmərəm. Onlar kollektiv şəkildə mübarizə apardılar. Rəqibin heyətində 4-5 oyunçu var ki, hər an oyunun taleyini həll edə bilərlər. Bununla belə, “Qarabağ” kollektiv oyun sayəsində uğur qazanır.

- Bolqarıstan mətbuatı sizin adınınız ən uğursuz transferlər siyahısında göstərib. Buna münasibətiniz necədir?

- Heç nə deyə bilmərəm.

- Yarımmüdafiəçi kimi çıxışınız daha yaxşı alınır. Bəlkə hücumda yox, orta xətdə oynayasız?

- Hər şey məşqçidən asılıdır. O harda desə, orada da oynayıram. Mövsüm ərzində hücumçu, cinah oyunçusu, 10 nömrə kimi də çıxış etmişəm.

- Özünüz üçün hansı mövqedə oynamaq daha rahatdır?

- Yarımmüdafiədə.