Təbriz Həsənov: “Qrupdan çıxmaq olar”

“Bu qrupdan çıxmaq olar. Bəzi güclü komandalardan uzaq olduq. Lakin qrupda yer alan komandalar da zəif deyillər”. Futbolxeber.az saytına açıqlamasında bu sözləri 17 yaşadək futbolçulardan ibarət milli komandamızın baş məşqçisi Təbriz Həsənov deyib.

Avropa çempionatının püşkünü dəyərləndirən Həsənov qrup favoriti kimi Portuqaliyanın adını çəkib: “Belçika və Şotlandiya milliləri zəif deyil. Bu komandalara qalib gəlmək olar. Lakin qrupun favoriti və ən güclüsü Portuqaliya millisidi”.

Yığmamızın baş məşqçisi qitə birinciliyinə qədər heyəti gücləndirəcəklərini qeyd edib: “Turnirə qədər heyətə yeni futbolçular cəlb olunacaq. Lakin indidən onların adlarını açıqlamaq istəməzdim”.

Təbriz Həsənov Avropa çempionatının startına kimi yoxlama oyunu keçirmək istədiklərini vurğulayıb: “Hələ ki, hansısa rəqiblə razılıq əldə olunmayıb. Amma bəzi çempionat iştirakçıları ölkəmizə 10 gün əvvəldən gələcəklər. Həmin komandalardan biri ilə yoxlama oyunu keçirmək yaxşı olardı. Çox istərdim ki, rəqiblərimizin oyun sisteminə uyğun olan komanda ilə qarşılaşaq”.