Ölkə kanallarından biganəlik: Rusiya - Azərbaycan oyununa necə baxaq?

21 yaşadək futbolçulardan ibarət milli komandamız bu gün Avro-2017-nin seçmə mərhələsi çərçivəsində növbəti oyununa çıxacaq. Futbolxeber.az saytının məlumatına görə, Yaşar Vahabzadənin komandası səfərdə Rusiya ilə qarşılaşacaq. Ötən il Bakıda bu komandalar arasında baş tutan oyun yığmamızın 3:0 hesablı qələbəsi ilə tamamlanıb. Həmin nəticə Rusiyada böyük əks-səda doğurmuşdu. Darmadağını həzm edə bilməyən ruslar məhz Bakıdakı yenilgidən sonra Dmitri Xomuxanı baş məşqçi postundan uzaqlaşdırmışdılar. Rostovda keçiriləcək oyuna şimal qonşularımız çox böyük önəm verirlər. Rəqibin heyətində azərbaycanlı və erməni futbolçuların olması görüşə marağı daha da artırır. Bir sözlə, bugünkü oyuna maraq kifayət qədər böyükdü. Lakin təəssüflər olsun ki, bu cür böyük maraq doğuran görüşə Azərbaycan telekanalları biganəlik nümayiş etdirirlər. Ölkədə 2 idman kanalı fəaliyyət göstərsə də, onlardan heç biri sözügedən matçı tamaşaçılara təqdim etməyəcək. Böyük ehtimalla, rusların yayım üçün pul tələb etməsi idman kanallarımızın qarşısında qırmızı işıq yandırıb. Amma sıravi tamaşaçı üçün bu məqam əhəmiyyət kəsb etmir. Tamaşaçı oyuna canlı baxmaq istəyir və onun bu tələbi tam haqlıdı.

Bəs, Rusiya - Azərbaycan görüşünə necə baxmaq olar? Matçı Rusiyada “МАТЧ! Футбол 1” kanalı canlı olaraq yayımlayacaq.

Qeyd edək ki, görüş 20:30-da başlayacaq.