Elnur Məmmədov: “Baza “Neftçi"nin 80 illiyinə hazır olacaq”

Bakıxanov qəsəbəsində yerləşən “Neftçi”nin bazasında təmir işləri davam edir. Futbolxeber.az saytının məlumatına görə, bu gün mətbuat nümayəndələri bazada görülən işlərlə yaxından tanış olublar.

“Ağ-qaralar”ın icraçı direktoru bazada görülən işlərlə bağlı jurnalistlər üçün brifinq keçirib. E. Məmmədov qeyd edib ki. bazadakı əsas meydança 3 hissəyə bölünəcək. Həmin meydançalardan birinin üstü qapalı olacaq ki, bu da taktiki hazırlıqlarının kənardan müşahidə olunmaması üçündür: “Meydançaların uzunluğu 105, eni isə 68 metrdi. Burada “Neftçi”nin əsas və aşağı yaş qrupları üzrə komandaları məşq edəcək. Bazada rəsmi oyunlar keçirilməyəcək. Bundan başqa, bazada 2 süni örtüklü meydança da olacaq ki, orada 13 yaşadək futbolçulardan ibarət komandalarımız məşq edəcək. Bütün tikinti işlərini yerli şirkətlər həyata keçirir. Eləcə də inzibati binanın tikintisi davam edir. Hazırda binanın 4 mərtəbədən ibarət olacağı dəqiqləşib. Qarşıdakı günlərdə binanın 4, 5, yoxsa 6 mərtəbədən ibarət olacağı dəqiqləşəcək. Futbolçuların binadan məşq meydançasına yollanmaq üçün giriş-çıxışlarının ayrı olması nəzərdə tutulub”.

Elnur Məmmədov qeyd edib ki, hazırda tikintinin maliyyə tərəfi barədə dəqiq məlumat verə bilməzlər: “Bazada görülən işlər təkcə futbolçular üçün nəzərdə tutulmayıb. Həm də bura gələn valideynlər üçün də şərait yaradılacaq. Bu məqsədlə restoran, şəbəkə mağazaları, istirahət üçün məkanlar da fəaliyyət göstərəcək. Tikinti tam olaraq "Neftçi"nin 80 illiyinə hazır olacaq. Amma işin maddi tərəflərini indi açıqlaya bilmərik. Çünki işlər hissə-hissə aparılır”.